ភ្នំពេញ៖ សម្ដេចព្រះមហាសង្ឃរាជនៃគណៈធម្មយុត្តិកនិកាយ បួរ គ្រី បានប្រឆាំង និងថ្កោលទោសចំពោះលោក សម រង្ស៊ី ដែលបានធ្វើប្រឆាំងជាមួយរាជរដ្ឋាភិបាលស្របច្បាប់កម្ពុជា។ ព្រះអង្គបានចាត់ទុកការលើកឡើងរបស់លោក សម រង្ស៊ី គឺជាការប្រមាថដោយអសីលធម៌ចំពោះនាយករដ្ឋមន្ត្រីកម្ពុជា។
ក្នុងព្រះរាជសារគាំទ្រចុះថ្ងៃទី១៨ ខែតុលា ព្រះមហាសង្ឃរាជ បួរ គ្រី មានថិរដីកាថា៖ «ប្រឆាំងដាច់ខាត និងថ្កោលទោសដាច់អហង្ការចំពោះក្រុមឧទ្ទាមក្បត់ជាតិ ៣ជំនាន់ ដែលធ្វើការប្រឆាំងជាមួយរាជរដ្ឋាភិបាលស្របច្បាប់ ដែលបានសេចក្ដីថ្លែងការណ៍ និងគម្រោងថ្មីតាមរយៈឃ្លីបវីដេអូក្នុងគោលបំណងផ្ដួលរំលំរាជរដ្ឋាភិបាលឆ្នាំ២០២៣ និងបានញុះញង់កងកម្លាំងប្រដាប់អាវុធឱ្យធ្វើការបះបោរ ព្រមទាំងបានប្រមាថដោយអសីលធម៌ចំពោះ សម្ដេចតេជោនាយករដ្ឋមន្ត្រី ដែលជា បិតាស្ថាបនិកសន្ដិភាពកម្ពុជា និងជាឯកអគ្គមគ្គុទេសក៏ដឹកនាំជាតិដ៏ឆ្នើម ជាទីគោរពស្រលាញ់ដ៏ខ្ពង់ខ្ពស់របស់ប្រជាពលរដ្ឋកកម្ពុជាគ្រប់រូប»។
ថ្លែងក្នុងពិធីប្រគល់សញ្ញាបត្រជូននិស្សិតសកលវិទ្យាល័យជាតិគ្រប់គ្រង ព្រឹកថ្ងៃទី១៧ ខែតុលានេះ សម្ដេចតេជោ ហ៊ុន សែន បានចាត់ទុកការអំពាវនារបស់ សម រង្ស៊ី ថាជាចេតនាទុច្ចរិតមានបំណងបំផ្លាញសន្ដិភាព ស្ថិរភាព និងការបោះឆ្នោតតាមលទ្ធិប្រជាធិបតេយ្យនៅកម្ពុជា។ ស្របពេលដែលឆ្នាំក្រោយជាខួប២០ឆ្នាំដែល សម រង្ស៊ី ប្រកាសថា មានស៊ីអត់សែន មានសែន អត់ស៊ីទៀតផងនោះ សម្ដេចតេជោ បានប្រកាសកំចាត់ចោលមនោគមន៍វិជ្ជាជ្រុលនិយមរបស់ត្រកូល សម ចោលតែម្ដង។
សម្ដេចតេជោថា៖ «ខ្ញុំនឹងប្ដូរផ្ដាច់កំចាត់ចោលមនោគមន៍វិជ្ជានយោបាយជ្រុលនិយម នៃត្រកូលក្បត់ជាតិបីជំនាន់។ អ្នកឯងមកនិយាយអំពីត្រកូលហ៊ុន បាន ត្រកូលហ៊ុន និងត្រកូលសម អត់ដូចគ្នាទេ! ត្រកូលហ៊ុន មិនដែលចេះក្បត់ទេ! ត្រកូលហ៊ុនបានរួមចំណែកធ្វើឲ្យប្រទេសនេះរីកចម្រើន។ ត្រកូល សម ទេដែលក្បត់តាំងពីជីតា រហូតដល់ឪពុក រហូតដល់កូន»។
ក្រោយការប្រកាសនេះយើងឃើញមានក្រសួង-ស្ថាប័នរដ្ឋជាបន្តបន្ទាប់បានចេញសារគាំទ្រប្រសាសន៍នាយករដ្ឋមន្ត្រីជាបន្តវបន្ទាប់ ខណៈអគ្គស្នងការមនគរបាលប្ដេជ្ញាចាប់លោក សម រង្ស៊ី ដាក់គុក ហើយអគ្គបញ្ជាការដ្ឋានកងយុទ្ធពលខេមរភូមិន្ទត្រៀមខ្លួនកម្ចាត់ក្រុមបះបោរផងដែរ៕
